Նոր բաժանմունք «Նաիրի» բժշկական կենտրոնում

Հայրենիքի համար ամեն մի նոր նախաձեռնում ֆրանսահայ բարեգործ բժիշկներ տեր և տիկին Գևորգ և Թամարա Աբգարյանները իրականացրել են պարտքի ու պատասխանատվության մեծ զգացումով:

Լինելով Փարիզի Hopital Prive Nord Parision (Օպիտա Պրիվե) և Hopital Beajon (Օպիտա Բոժոն) անուն հանած մասնավոր հիվանդանոցների տնօրենն ու սեփականատերը, պարոն Աբգարյանն արդեն երկու տասնամյակից ավելի ձգտում է իր կլինիկաների բժշկական ժամանակակից տեխնոլոգիաները Հայաստանի կլինիկաներում ներդնելով` ծառայություն մատուցել առողջության խնդիրներ ունեցող հայ ժողովրդին: 

Այսպիսի մի նախաձեռնությամբ էլ մայրաքաղաքի «Նաիրի» բժշկական կենտրոնում նա հիմնադրեց քիմիաթերապիայի ժամանակակից բաժանմունք, որը համբավավոր բժիշկ-բարեգործը նվիրել է վաղամեռիկ կնոջ սուրբ հիշատակին: 

Բաժանմունքի բացման ժամանակ «Նաիրի» բժշկական կենտրոնի տնօրեն Նարինե Մամիկոնյանը կարևորեց այն հանգամանքին, որ մեր պետությունը հատուկ ուշադրություն է դարձնում Հայաստանի քաղաքացիների կյանքի որակի և տևողության բարձրացման հիմնարար խնդիրներին` կիրառելով ԱՀԿ-ի միջազգային բժշկական համատեղ ծրագրերի իրականացման հարուստ փորձը և, իհարկե, Սփյուռք-Հայրենիք համագործակցության դրական դրսևորումները: 

Եվ, ներկայացնելով ֆրանսահայ բժիշկ-բարեգործ Գևորգ Աբգարյանին, տիկին Մամիկոնյանն իր երախտագիտությունն հայտնեց իրենց կլինիկայում նման անհրաժեշտ բաժանմունք հիմնադրելու առիթով: 

Պարոն Աբգարյանը նշեց, որ նմանատիպ առաքելություններով Հայաստան է այցելում 23 տարի շարունակ, սերտ կապեր են ստեղծված «Էրեբունի», «Շենգավիթ» բժշկական կենտրոնների հետ: Ինչ վերաբերում է «Նաիրի» բժշկական կենտրոնում քիմիաթերապիայի բաժանմունք հիմնադրելու գաղափարին, նա խոստովանեց, որ դա կնոջ վերջին ցանկությունն է եղել: 

Պարոն Աբգարյանը փաստեց, որ արդեն մայիս ամսից բաժանմունքը պարբերաբար կընդունի քիմիաթերապիայի կարիք ունեցող քաղցկեղով հիվանդներին: Ընդ որում, բուժումը կիրականացվի բարեգործի վերոհիշյալ հիվանդանոցների ֆրանսիացի  փորձառու ուռուցքաբանների անմիջական մասնակցությամբ ու աջակցությամբ: Պակաս կարևոր չեն լինի հիվանդների  համար ֆրանսիացի հայտնի ուռուցքաբան մասնագետների` պրոֆեսորներ Համելը, Բոազիսը, Շալմեն և այլոց խորհրդատվությունները: Ինտերնետային «օն-լայն» կապի միջոցով կվերահսկվի հիվանդների տվյալների փոխանակումը ֆրանսիացի գործընկերների հետ:

«Մեր նպատակն է, բաժանմունքի հիմնադրման շնորհիվ, հնարավորություն ընձեռել Մայր հայրենիքում եվրոպական չափանիշներին համապատասխան արդյունավետ քիմիաթերապիա իրականացնել: Կկիրառվեն արդիական տեխնոլոգիաներով հագեցած այնպիսի նորագույն ծառայություններ, ինչպիսիք են ցավի կառավարումը, հոգեբանական խորհրդատվությունը, ճիշտ սնվելու և կենսակերպի վերականգնումը: Բնական է, բարձրակարգ քիմիաթերապիան կիրականացվի նորագույն սարքավորումներով, հանգամանք, որ մեր հայրենակիցներին կյանքի երկարացման երաշխիքներ է խոստանում:  Բաժանմունքում հիվանդների բուժման աշխատանքները կիրականացնեն ՙՆաիրի՚ բժշկական կենտրոնի  վերականգնողական բաժանմունքի վարիչ Անատոլի Գնունին և քիմիաթերապևտ Արմինե Զարգարյանը»,- նշեց պարոն Աբգարյանը:

Նա, միաժամանակ, հավաստիացրեց, որ առաջիկայում իրենց համագործակցությունը Հայաստանի կլինիկաների հետ կընդլայնվի, մտադիր են առավել մեծ ծավալներով քիմիաթերապիայի բաժանմունք բացել նաև ակադեմիկոս Ֆանարջյանի անվան Ուռուցքաբանության կենտրոնում:

Ուռուցքաբանության կենտրոնի տնօրեն, պրոֆեսոր Հ.Գալստյանը բժիշկ Աբգարյանի քայլը համարելով հայրենանվեր նախաձեռնում, հույս հայտնեց, որ այդ բաժանմունքը ևս հագեցված կլինի վերջին սերնդի ուռուցքաբանական սարքավորումներով և դեղորայքով, որոնք հիվանդների բուժումը կդարձնեն առավել արդյունավետ: 

Այնուհետև քիմիաթերապիայի բաժանմունքի բացման կարմիր ժապավենը կտրելով «Նաիրի» բժշկական կենտրոնի տնօրենն ու նախաձեռնության հեղինակ Գևորգ Աբգարյանը շնորհանդեսի մասնակիցներին ծանոթացրին նորաբաց բաժանմունքին: 

Հարցեր, պատասխաններ, մեկնաբանություններ